Mfumo mpya, matatizo yaleyale - Alonso hafurahishwi na Chelsea ‘laini’

- Imechapishwa

Ilikuwa ni simulizi iliyokuwa tayari inafahamika kwa wafungaji bora wa Ligi Kuu.

Sare ya kusisimua ya Chelsea ya 2-2 dhidi ya Hull Jumamosi inamaanisha Blues sasa wamefunga mabao 10 msimu huu - lakini pia wameruhusu mabao mawili au zaidi katika kila moja ya mechi zao nne za mwanzo za ligi kwa mara ya kwanza ndani ya miaka 11.

Ni Crystal Palace na Ipswich Town pekee waliokuwa wameruhusu mabao mengi zaidi kuliko mabao tisa ya Chelsea kwenye ligi kuu mpaka sasa msimu huu.

Tatizo hili lilikuwepo hata kabla ya kuwasili kwa kocha Xabi Alonso. Chelsea sasa hawana mechi ya clean sheet katika mechi 20 za ligi mfululizo tangu Januari, mfululizo mrefu zaidi kwa miaka 65.

Alonso bado anaonekana kuwa kwenye hatua ya kujaribu-jaribu. Wiki hii pekee, alibadilisha mfumo katika mechi tatu mfululizo - kuanzia kipigo dhidi ya Arsenal hadi ushindi wa 6-3 wa Kombe la Carabao dhidi ya Leeds katikati ya wiki na tena dhidi ya Hull.

Hata hivyo, ni Hull walioonekana kuwa na uwezekano mkubwa zaidi wa kupata bao la ushindi. Si ajabu hali ya Stamford Bridge ikawa ya ukimya na uzito.

Alonso alifupisha hisia hizo baada ya mechi, akisema kikosi chake kinahitaji "kushindana vizuri zaidi" na kuepuka kuwa "laini" kwenye mapambano ya ana kwa ana.

Kulikuwa pia na makosa ya mtu mmoja mmoja.

Jorrel Hato alikosea kukadiria krosi kabla ya Hull kufunga bao lao la kusawazisha, huku bao la pili la Mohamed Belloumi likija baada ya Chelsea kushindwa kuondoa hatari ya kona.

Licha ya bao la mapema la Morgan Rogers na bao la kusawazisha kipindi cha pili la Joao Pedro, huku Cole Palmer akihusika kwenye mabao yote mawili, Chelsea walilazimika kuridhika na pointi moja.

Kocha wa Hull Sergej Jakirovic hata alimwelezea kipa wa Chelsea Emiliano Martinez kama "mchezaji bora wa mechi" baada ya Muargentina huyo kuwanyima Oli McBurnie, Mohamed-Ali Cho na Lucas Herrington.

Alipoulizwa kuhusu matatizo ya ulinzi wa Chelsea, beki wa zamani na mchambuzi wa BBC Ashley Williams alisema: "Chelsea wapo ovyo kabisa kwenye mabadiliko ya mchezo (transitions). Wanapopoteza mpira, wanabaki wazi kabisa. Mabao waliyofungwa ni makosa ya msingi tu.

"Kwa mtu mmoja mmoja na pia kama safu ya ulinzi, wako mbali sana na kiwango na wanaruhusu mabao kirahisi. Hawatafikia wanachotaka msimu huu wakitumia ulinzi wa namna hiyo."

'Tulipata kile tulichostahili'

Kwa Rogers, Palmer na Joao Pedro wakiwa kwenye kiwango kizuri sana cha ushambuliaji msimu huu, Blues wanafahamu wanahitaji kupata majawabu upande wa ulinzi.

Alonso alisema: "Tulikuwa na nafasi moja au mbili nzuri za kupata bao la ushindi, lakini bado uko wazi. Sijafurahishwa. Tunaweza kufanya vizuri zaidi. Tulipata kile tulichostahili.

"Tunahitaji kuwa imara zaidi na kuwa na udhibiti zaidi. [Tuna] wachezaji wapya na benchi jipya la ufundi. Huu ndiyo mchakato. Ndani ya miezi michache nina uhakika tutaweza kudhibiti vizuri zaidi."

Hata hivyo, alisema uamuzi wake wa kubadili na kucheza mabeki wanne haukuwa suluhisho la matatizo ya ulinzi ya hivi karibuni, akieleza: "Ni kuhusu wasifu wa wachezaji.

"Unaweza kusema ilikuwa mabeki watatu au wanne, kwa hiyo ni kuhusu uchaguzi wa wachezaji, ubora wao, na wapi wanacheza vizuri zaidi.

"Leo tulicheza na Malo [Gusto], alikuwa anacheza kwenye maeneo mazuri, tukijaribu kumtafuta na upande wa kulia kuunganisha na wachezaji wengine, kwa hiyo kwangu haikuwa mabadiliko makubwa sana."

Ilikuwa ni uamuzi wa "kimbinu" kumtoa Hato kipindi cha mapumziko, aliendelea, kabla ya kwenda kwa undani zaidi kuhusu kitakachohitajika kurekebisha matatizo ya Chelsea.

"Labda yote yanaonekana ya kuburudisha, lakini natumaini siku moja mtasema ulikuwa mchezo wa kuchosha na tukashinda na hatukutoa hizi nyakati za kuburudisha," Alonso aliongeza. "Lakini kwa hakika inaonekana kama baadhi ya mifumo tunayofanya inajirudia.

"Itachukua muda au itachukua nyakati kuzirekebisha tunapopata uongozi halafu bado unahitaji kuendelea kushindana na usiwape nafasi kwa urahisi wa kurejea. Hususan kwenye bao la kwanza, tunaweza kufanya vizuri zaidi.

"Ilikuwa laini sana kuwapa matumaini haya kwa sababu hadi wakati huo tulikuwa tunadhibiti, tulikuwa tunatengeneza nafasi, lakini ile kasi (momentum) tuliyokuwa nayo ilibadilisha hali ya mchezo na matokeo ya mchezo na ni kitu tunachohitaji kukizungumza [kuhusu], tukikishughulikia na tutakuwa bora zaidi, lakini kwa sasa kinaathiri kiwango chetu."

Kutakuwa na wasiwasi kuelekea safari ya kwenda Brentford Ijumaa, mechi ya mwisho kabla ya mapumziko ya wiki tatu ya michezo ya kimataifa, ikizingatiwa kuwa Bees wanajulikana kuwa hatari kwenye mipira ya kutenga.

Hata hivyo, si mipira ya kutenga tu. Chelsea wameruhusu mabao mengi zaidi yakitokana na mpira wa wazi, jambo ambalo Alonso alilikiri.

"Kwa ujumla, nafikiri tunashambulia vizuri kuliko tunavyotetea katika kila eneo," aliendelea.

"Tunajua hii ni mada kubwa na dhamira kubwa kwetu. Kwa hakika ni mechi nne tu, lakini mwenendo wa kuruhusu mabao, haujinifurahishi na tunahitaji kufanya vizuri zaidi. Mpira wa wazi, mipira ya kutenga, mipira mirefu, huu ugumu, hii hali ya ushindani, tunaweza kufanya vizuri zaidi."

Baadhi ya wachezaji, kama Malo Gusto, wamekuwa wakikosolewa na mashabiki, na mabadiliko yake yalishangiliwa na mashabiki wake wenyewe ndani ya Stamford Bridge.

Wakati huohuo, kwa Moises Caicedo kuwa nje kwa majeraha, Chelsea wameonekana kupungukiwa ubora na idadi ya wachezaji katikati ya uwanja.

Monaco walivunja mpango wa Chelsea wa pauni milioni 47 kumtwaa kiungo Lamine Camara siku ya mwisho ya usajili (deadline day), baada ya Chelsea kufanya jitihada kumsajili Manu Kone wa Roma na Sander Berge wa Fulham kama chaguo mbadala.

Usajili muhimu wa ulinzi Maxence Lacroix aliachwa nje Jumamosi lakini hakuna hata moja ya chaguo za ulinzi lililoonekana kung’ara msimu huu, ingawa safu ya ushambuliaji bado iko kwenye moto mkali.

Itakuwa juu ya Alonso kuyatatua matatizo haya uwanjani mazoezini huku kukiwa hakuna tena nafasi ya kusajili wachezaji hadi dirisha la usajili la Januari.