Championship ni eneo bora kugundua vipaji - Monchi wa Espanyol

- Imechapishwa

Mkurugenzi wa michezo wa Espanyol, Monchi, anaamini klabu za Hispania zinapaswa kuelekeza macho yao kwa ukaribu zaidi kwenye Championship ya England, akiitaja kuwa moja ya mashindano ya soka “yasiyoeleweka kirahisi” na chanzo kinachozidi kuvutia cha vipaji.

Aliyekuwa kipa huyo amerejea nchini kwao Hispania baada ya miaka miwili akiwa rais wa idara ya uendeshaji wa masuala ya soka (president of football operations) katika Aston Villa, huku kabla ya hapo akiwahi kushika nyadhifa za mkurugenzi wa michezo katika Sevilla na Roma.

Espanyol wenye makao yao Barcelona, waliomaliza nafasi ya 11 kwenye La Liga msimu uliopita, ni miongoni mwa klabu kongwe Hispania, wakiwa wameanzishwa mwaka 1900.

Monchi anasema kuwinda vipaji kwenye daraja la pili la England ni sehemu ya mkakati mpana wa kuchangamkia masoko ambayo Espanyol wanaweza kushindana, licha ya vikwazo vya kifedha vinavyowekwa kwa klabu za Hispania.

Espanyol wana uhusiano wa moja kwa moja na Championship - kwani kundi la wamiliki wa klabu hiyo, linaloongozwa na Alan Pace, pia linamiliki Burnley.

“Nadhani Championship ni moja ya mashindano yasiyoeleweka kirahisi,” Monchi aliiambia BBC Sport.

“Baada ya kuishi England kwa miaka miwili na kufanya kazi na Aston Villa, na sasa nikiendelea kufuatilia mashindano haya kwa sababu ya Burnley, naweza kusema kuna wachezaji wengi wazuri huko.”

Mhispania huyo mwenye umri wa miaka 57 anamtaja Morgan Rogers kama mfano mmoja wa kipaji kilichopita Championship.

Rogers alijiunga na Aston Villa akitokea Middlesbrough mwaka 2024 baada ya muda katika daraja la pili, kisha akawa mchezaji wa kimataifa wa England kabla ya kukamilisha dili la pauni milioni 117 (£117m) kuhamia Chelsea majira ya kiangazi haya.

“Huo ni mfano mmoja tu, lakini naweza kutoa mingine mingi,” Monchi alisema.

“Nadhani ni mashindano yenye ushindani wa kiwango cha juu kupita kiasi, makocha wazuri sana na mahitaji makali. Ni sehemu bora kabisa ya kugundua vipaji.”

Tyrhys Dolan alijiunga na Espanyol akitokea Blackburn Rovers Julai 2025 baada ya misimu mitano kwenye Championship, huku sasa klabu hiyo ya Hispania ikimsajili kwa mkopo mchezaji wa kimataifa wa Uholanzi Quilindschy Hartman kutoka Burnley.

'Siwezi kuepuka kujiangalia Uingereza'

Kwa Espanyol, Championship inamaanisha zaidi ya fursa ya kusaka wachezaji.

Klabu za Hispania zinafanya kazi chini ya ukomo wa gharama za kikosi (squad-cost limits) wa La Liga, ilhali klabu za Premier League zina rasilimali kubwa zaidi kifedha.

Monchi hivyo anaamini klabu kama Espanyol lazima zitambue masoko ambayo usajili wa busara unaweza kufidia pengo la uwezo wa matumizi.

“Hatuwezi kufanya kila kitu ambacho tungependa kufanya, lakini tunafanya tunachoweza,” alisema.

“Ni kweli tuko kwenye hasara ukilinganisha na baadhi ya klabu za Hispania, na hasa zaidi ukilinganisha na klabu za England, Italia au Ujerumani.

“Hata hivyo, tunapaswa kuwa wabunifu, kufanya kazi kwa bidii na kutafuta njia mbadala.”

Kiunganishi kati ya Espanyol na Burnley kinampa Monchi uhusiano wa karibu na soka la England.

“Siwezi kuepuka kujiangalia Uingereza,” alisema.

England ilimfundisha nini Monchi

Miaka miwili ya Monchi katika Aston Villa pia ilibadili mtazamo wake kuhusu namna ambavyo klabu ya kisasa inapaswa kuendeshwa.

Kwa kipekee, alivutiwa na mgawanyo wa wazi wa majukumu kati ya upande wa michezo na upande wa biashara, huku pia kukiwa na uhusiano imara kati ya umiliki, wafanyakazi na mashabiki.

“Kulikuwa na utofauti wa wazi sana kati ya upande wa biashara na upande wa michezo,” alisema.

“Kulikuwa na ushirikiano mzuri sana ndani ya klabu nzima, uhusiano imara na wamiliki na ukaribu mkubwa na mashabiki.

“Hiyo haimaanishi tunatumia kila kitu kwa namna ileile kabisa [Espanyol], lakini ni uzoefu wenye thamani.”

Tukio lake lisilosahaulika zaidi England lilitokea msimu wake wa kwanza Villa 2023-24, walipofuzu Ligi ya Mabingwa.

“Baada ya miaka 40 hivi bila kucheza Ligi ya Mabingwa, kupata tiketi ya kufuzu ilikuwa ni wakati mzuri sana,” alisema.

Villa pia walifika nusu fainali ya Conference League msimu wake wa kwanza, kabla ya kufika nusu fainali ya FA Cup na robo fainali ya Ligi ya Mabingwa katika kampeni yake ya pili.

Takwimu zimebadili usajili

Mbinu ya Monchi ya kuwatambua wachezaji imebadilika kwa kiwango kikubwa tangu alipoanza kufanya kazi kama mkurugenzi wa michezo zaidi ya miaka 25 iliyopita.

Mabadiliko makubwa zaidi, anasema, ni kuingia kwa takwimu (data) na akili bandia (artificial intelligence).

“Hatutegemei tena tu ripoti za upelelezi wa vipaji (scouting) na tathmini za hisia binafsi, bali pia msaada unaotolewa na big data, akili bandia na uchambuzi wa takwimu kwa ujumla,” alisema.

“Klabu zote zimefanya hivyo, na mimi binafsi, nimejifunza kuendana na teknolojia mpya.”

Kwa Espanyol, hilo linamaanisha kuchanganya usajili unaoongozwa na takwimu na ujuzi wa soko ambao Monchi ameujenga katika taaluma yake Hispania, Italia na England.

Lengo si tu kupata wachezaji wa bei nafuu, bali kutambua wachezaji wanaoweza kuongeza ushindani wa klabu na hatimaye kusaidia kupunguza pengo la kifedha dhidi ya wapinzani wenye fedha nyingi.

Kushindana na Barcelona

Monchi pia yuko wazi kwamba Espanyol hawapaswi kupima maendeleo yao kwa kujilinganisha na Barcelona, licha ya klabu hizo mbili kuwa kwenye mji mmoja.

“Espanyol wanapaswa kujielekeza kwao wenyewe,” alisema.

“Barcelona ni klabu kubwa na timu muhimu, lakini sidhani kama ukuaji wa Espanyol unapaswa kupimwa dhidi ya Barcelona. Kigezo cha Espanyol kinapaswa kuwa Espanyol yenyewe.”

Dhamira yake ni kuirejesha Espanyol kwenye hadhi ambayo historia yao inaonyesha walipaswa kuwa nayo.

Historia ya klabu hiyo, anaamini, inatoa ramani ya mahali wanapoweza kurejea tena.

“Espanyol wana historia ya kutosha na yaliyopita ya kutosha kiasi kwamba tunaweza kuangalia nyuma klabu imewahi kuwa nini, na kujaribu kuirejesha Espanyol hiyo tena,” alisema.

“Espanyol ambayo ilikuwa miongoni mwa klabu muhimu zaidi Hispania. Hapo ndipo tunapaswa kulenga kurejea.”

Lengo la haraka ni la wastani zaidi: kuboresha nafasi ya ligi ya msimu uliopita na kuimarisha mradi.

Lakini chini ya tahadhari hiyo ya muda mfupi, kuna imani iliyo wazi kwamba Espanyol wanaweza hatimaye kupanda na kushindana juu zaidi kwenye La Liga.

“Dhamira ni kuboresha nafasi ya ligi ya msimu uliopita na kuendelea kusonga mbele, hatua kwa hatua na kuimarisha mradi,” Monchi alisema.

Na ikiwa Championship itaendelea kutoa aina ya wachezaji h