Nina deni kubwa kwa Villa lakini Man Utd wako juu yao - Tielemans

- Ilichapishwa

Ilikuwa ni mara ya tatu ndiyo bahati msimu huu wa kiangazi katika historia ya Youri Tielemans na Manchester United.

United waliichunguza kwa umakini kiungo huyo wa Ubelgiji mwaka 2019, baada ya Tielemans kung’ara katika kipindi chake cha awali cha mkopo Leicester. Na tena mwaka 2022, walipochelewa mno wakisubiri Frenkie de Jong aamue kama yuko tayari kuondoka Barcelona.

Lakini ilikuwa Julai hii, wakati mchezaji huyo wa miaka 29 akiwa kwenye majukumu ya Kombe la Dunia, ndipo klabu hiyo ya Old Trafford ilipochukua hatua, ikiamsha kipengele cha kuvunja mkataba cha £35m ili kumnyakua Tielemans kwa mkataba wa miaka mitano kutoka Aston Villa.

“Kulikuwa na mara mbili nilizungumza na klabu, lakini haikufikia chochote,” alikumbuka.

“Nilikuwa mtulivu sana. Kwa kweli sikutarajia makubwa kiangazi hiki. Nilikuwa nimejikita tu kwenye mpira wangu, nimejikita kwenye Kombe la Dunia na kujaribu kufanya vizuri zaidi kwa taifa langu.

“Lakini unajua kila kiangazi kitu kinaweza kutokea na bila shaka nilikuwa naijua hiyo clause.

“Ninashukuru sana Aston Villa. Nawadai dunia. Ni klabu kubwa, tulifanya mambo ya ajabu na wamenirudisha kwenye kiwango changu bora. Lakini kuna klabu zilizo juu ya Villa, na Manchester United ni mojawapo.

“Ni mafanikio makubwa kwa mchezaji yeyote wa soka kuishia hapa. Ina maana umefanya vizuri kwenye taaluma yako. Lakini haishii hapo. Nataka kuwa na mafanikio.”

Tielemans anaonekana mwepesi na mwenye utulivu anapofanya mahojiano yake ya kwanza marefu na vyombo vya habari tangu ahame Villa, akitenga muda kuwapa mkono binafsi waandishi wote waliokuwepo.

Wakati mwingine anang’aa kwa tabasamu, hasa anapoulizwa kama—ikizingatiwa alifunga bao la ushindi la Leicester kwenye fainali ya FA Cup ya 2021 na kisha bao la kwanza kwa Villa kwenye ushindi wao wa Europa League dhidi ya Freiburg mwezi Mei—anaweza kuleta mabao Manchester United.

“Hilo ndilo lengo,” alijibu.

Pia inaonekana wazi kwa muonekano wake kwamba ushirikiano na nahodha Bruno Fernandes unaanza kuchanua.

Vigogo wa Manchester United walilibaini hilo Gothenburg wikiendi iliyopita, ingawa wawili hao walikuwa uwanjani pamoja kwa dakika 26 tu katika sare ya 1-1 na Paris St-Germain.

“Ni jambo la kawaida tu,” alisema. “Yeye ni mtu anayeweza kutafuta nafasi kwa urahisi. Mimi najitahidi kumtafuta ili aweze kusonga mbele.”

Hata hivyo Tielemans ni mtafakari, na majibu yake yana upana, hata kama wakati mwingine anachosema si kile unachotarajia kusikia.

Moja ya mambo hayo ni kuhusu urefu wa taaluma yake na idadi ya mechi alizocheza.

Alianza kucheza soka la kulipwa akiwa na Anderlecht akiwa na miaka 16. Amecheza mechi 668 kwa klabu na taifa na alilazimika kujitoa kwenye robo fainali ya Kombe la Dunia ya Ubelgiji dhidi ya Hispania mwezi uliopita baada ya kupata tatizo wakati wa mazoezi ya kabla ya mechi.

“Kwa kweli najisikia vizuri sana,” alisema.

“Katika ile mechi ya mwisho, ilikuwa ni mzigo tu wa michezo mingi; dakika nyingi mno. Kwa bahati mbaya mwili wangu haukuweza kuhimili tena.

“Tulicheza dakika 120 dhidi ya Senegal, kisha tukacheza na US siku chache baadaye, siku tatu baada ya hapo tukacheza dhidi ya Hispania.

“Wakati wa warm-up, mwili wangu ulizima tu kwa sababu fulani.

“Sidhani kama mimi ni mchezaji ambaye lazima apumzike kwa lazima. Ni kweli kuna michezo mingi, na kocha anatakiwa kusimamia kikosi, lakini ninapokuwa sawa, niko sawa.

“Pale inapoenda vibaya, nitajua mara moja na nitamjulisha kocha. Lakini haitokei mara nyingi.”

Ingawa Tielemans ni mgeni Manchester United, kuna nyuso za kawaida zinamsaidia kuzoea.

Anayeongoza ni Jonny Evans, aliyekuwa mwenzake Leicester. Wawili hao wameendelea kuwa karibu na Evans alimpa kocha mkuu Michael Carrick taarifa nzuri ya tabia na mienendo ya Tielemans.

Tielemans pia aliwahi kucheza na Harry Maguire kwa muda mfupi Leicester, na Marcus Rashford alikuwa mwenzake Aston Villa.

Kwa mshangao wa wengi, labda hata yeye mwenyewe, Rashford amerudi kwenye klabu yake ya utotoni, baada ya awali kuondoka kwenda Villa katika mazingira yenye sintofahamu kufuatia mvutano wake na Ruben Amorim.

“Alikuwa mzuri sana,” Tielemans alisema.

“Kulikuwa na maneno mengi kumhusu, shinikizo na vyombo vya habari vilivyomzunguka, lakini yeye alikuwa mzuri sana.

“Alikuwa mnyenyekevu na mchapakazi, na kuanzia mazoezi ya kwanza tu ungeweza kuona mguso wake wa mpira na kasi yake ya kwanza ilikuwa ya ajabu. Hicho ndicho tulichokihitaji wakati ule. Alifanya mambo mengi mazuri na natumaini anaweza kuyatoa hapa.”

Kuwa huru na ‘kunusa’ soka

Inaweza kusemwa ujio wa Tielemans unajibu tatizo ambalo Manchester United imekuwa nalo tangu Carrick alipoondoka mwaka 2018; kiungo mbunifu mwenye jicho la pasi, anayeweza kuvunja mstari wa ulinzi.

Kwa nadharia, hilo litampa Fernandes nafasi zaidi kusogea mbele na kutoa fursa ya kudhibiti michezo kwa timu ambayo, katika nyakati za karibuni, imekuwa ikionekana kuwa bora zaidi kwenye mashambulizi ya kushtukiza.

Tielemans alipata mazungumzo mafupi na Carrick kabla hajakamilisha uhamisho wake.

Lakini siku 10 zilizopita zimetoa picha kubwa ya matarajio ya Carrick.

“Anataka niwe huru uwanjani, nijaribu kuipanga timu kadri niwezavyo,” alisema.

“Ana mfumo wake. Anataka kuwa na mpira na anataka kubana (press) kwa namna fulani.

“Inaweza kuwa tofauti na nilivyozoea, lakini kwa maoni yangu ni vitu vya kimantiki.

“Ni kunusa tu soka, ambacho ndicho nimekuwa nikifanya tangu nikiwa mdogo Anderlecht, unajua.

“Kwangu, hakuna kinachobadilika, ila tu inahitaji kuungana (gel) pamoja.”